945 22 68 31

DOHAINTZAK

Ascudeani buruz

Mendekotasuna duten pertsonen familia zaintzaile batzuek ASCUDEAN elkartea sortu genuen 2000n, eta, 2001ean, irabazi asmorik gabeko elkarte gisa inskribatu ginen: etxean mendekoak zaintzen dituzten familien elkarte bakarra gara Euskadin.

Gure elkartea, esan bezala, mendekotasuna dutenen familia zaintzaileek osatzen dugu; izan ere, arazo eta premia komunak dauzkagu, eta norberaren egoera partekatu eta ulertuko duten pertsonekin egoteak on egiten digu. 2016an, ordea, arreta-eremua zabaldu, eta mendekotasuna duten pertsonak ere artatzen hasi ginen; betiere, 65 urtetik beherakoak izanez gero edo familia- nahiz gizarte-sarerik gabekoak izanez gero.

Hortaz, mendekotasuna dutenen familia zaintzaileak, mendekotasuna dutenak eta erakundearen ‘lagunak’ dira gure arretaren xede.

Bada, honako hauek dira irabazi asmorik gabeko elkarte honen helburuak:

  • Zaintza-egoeretan murgilduta dauden herritarrei aholkua eta orientazioa ematea.
  • Familia zaintzaileei, mendekotasuna dutenei eta aldi baterako ezintasuna dutenei laguntzea eta haiekin esku-hartze soziala egitea.
  • Familia zaintzaileen eta mendekotasun-egoeran daudenen bizi-kalitatea hobetzea, bai osasun-arloan, bai arlo sozialean.
  • Hedapen- eta dibulgazio-guneak sortzea, zaintza-lanak eta familia zaintzaileen nahiz mendekotasuna dutenen egoera gizartean ikusgai egin daitezen eta gizarteak oro har errealitate horren berri izan dezan.
  • Mendekotasun-egoeran daudenen zaintzaren askotariko alderdiei buruzko ikerketa soziala sustatzea.
  • Komunitatearen eremu guztietan boluntariotza eta parte-hartze soziala bultzatzea.
  • Emakumeen eta gizonen berdintasuna eta aukera-berdintasuna sustatzea.
  • Ekonomia soziala bultzatzea eta lan-arloan ezkutuko ekonomia desagerrarazten laguntzea.
  • Gizarte-bazterketarako arriskuan daudenei babesa ematea eta eremu soziosanitarioan enplegua lortzeko gizarte- zein lan-arloko ibilbideetan haien bidelagun aritzea, migratzaileak izan ala ez.
  • Familia zaintzaileen eta mendekotasun-egoeran daudenen interesen ordezkari izatea administrazio publikoen aurrean.
  • Pertsona horiei gizartean ikusgaitasuna ematea. Familia zaintzaileen eta mendekotasuna dutenen eskubideak babestea.
  • Etxeko eta zaintzetako langileek egiten duten lan soziosanitarioa duintzen laguntzea.
  • Hainbat espezialitatetako prestakuntza arautu eta ez-arautuan parte hartzea, baita hirugarren sektoreko beste erakunde batzuetan ere, familia zaintzaileen eta mendekotasun-egoeran daudenen benetako egoeraren berri emateko.
  • Mendekotasunaren eta zaintzen inguruko prestakuntza-guneak sortzea, herritar guztientzat.
EMATEN DITUGUN ZERBITZUAK

2000tik, Ascudean elkarteak berehalako laguntza ematen die mendekotasuna dutenak etxean zaintzen dituzten familiei, askotariko programen bidez, haien bizi-kalitatea hobetzeko eta zaintzaileen alderdi biopsikosozialetan eragiteko asmoz.

ASCUDEAN elkartea osatzen duten familia edo pertsona guztiek jaso ditzakete eskaintzen ditugun programa eta zerbitzuak. Zerbitzuok urtero aldatzen dira, familiek helarazten dizkiguten premien arabera. Jarduerak etengabe egokitzen ditugu egoera berrietara, etxean zaintzen duten familiei beti laguntze aldera.

ASCUDEANek 21 urte daramatza askotariko proiektuak eta jarduerak gauzatzen, sortze-helburua betetzeko. Proiektuokin, mendekotasunaren prebentzioa, mendekotasuna agertzen den unea eta bizitzaren amaierara arteko zaintzak jorratzen ditugu.

AHOLKULARITZA ETA BIDELAGUNTZA SOZIALA
  • Orientazio, aholkularitza eta bidelaguntza etengabeak
  • Baliabide publiko eta pribatuei, dirulaguntzei,

egin beharreko izapideei eta abarrei buruzko informazioa.

  • Bakarrik bizi diren eta/edo mendekotasuna dutenentzako bidelaguntza.
FAMILIEN ATSEDENALDIA, AISIALDIA ETA ASTIALDIA
  • Asteburuko ibilaldi eta irteerak, familiek atseden har dezaten.
  • Eguneko jarduerak.
  • Aisialdiaz eta astialdiaz gozatzeko informazio- eta prestakuntza-tailerrak.
  • Oporretako bizikidetzak.
  • Zaintzaileentzako termalismoa.
  • Bizikidetzak, landa-eremuan jarduerak eginez.
OSASUN-ARLOKO JARDUERAK

Zaintzaileek osasun emozional, fisiko eta sozialarekin zerikusia duten gaietan beren burua zaintzeko askotariko jarduerak. Kirol-jardueretako eta autozaintzako taldeak, tailerrak, hitzaldiak, ikastaroak…

FAMILIA ZAINTZAILEENTZAKO PRESTAKUNTZA

Familientzako ikastaro eta prestakuntza-tailerrak. Askotariko ikastaroak dauzkagu, eta familien nahiz mendekotasuna dutenen premia guztiak jorratzen saiatzen gara: gizarte-baliabide eta -laguntzak,

lege-kontuak, testamentuak eta herentziak, alderdi psikologikoak, zainketa sanitarioak, zainketa aringarriak, etxez etxeko zerbitzuko profesionalen kontratazioa, etxeko ezustekoak, dolua, teknologia berrien prestakuntza…

BIDELAGUNTZA TERAPEUTIKOA

Banakakoa, familiarra, psikohezitzailea (mendekotasuna duenarekin). Laguntza- eta autolaguntza-taldeen, coaching-aren, tratamendu psikofisikoen eta familia-bitartekaritzaren bidez. Doluan laguntzeko arreta.

AHOLKULARITZA TEKNIKOA ETXEAN, MOBILIZAZIOA ETA LAGUNTZA TEKNIKOAK

Etxea egokitzeko, mobilizazio-teknikak ikasteko eta etxean laguntza teknikoak erabiltzeko. Laguntza teknikoen mailegua: gurpildun aulkiak, garabiak, taka-takak, komuneko altxagailuak, baineretako eserlekuak, oheak…

Ortopedietan deskontuak egitea eta osasun-materiala ematea (bustitzaileak, pixoihalak…), jada behar ez duten beste familia batzuek baliabide ekonomiko urriak dituzten familiei emandakoak.

DIBULGAZIOA ETA SENTSIBILIZAZIOA

ASCUDEANen, familia zaintzaileen ikusgaitasuna, aitortza eta protagonismoa bultzatzeko egiten dugu lan, halaxe merezi dute-eta. Horri begira, askotariko dibulgazio- eta sentsibilizazio-jarduerak, boluntario-taldeak, harrera-taldeak eta familia laguntzaileen topaketa-taldeak antolatzen ditugu.

KANPOKO ZERBITZU OSAGARRIAK

Zaintzaileentzako eta mendetasun-egoeran dauden pertsonentzako zerbitzuak izapidetzea: fisioterapia, osteopatia, etxez etxeko ile-apainketa, etxez etxeko podologia, mendekotasuna duten pertsonentzat egokitzeko arropa konpontzea, laguntza teknikoak, ortopediak, bainugelak egokitzea, etxeko konponketak, tele-alarma edo telelaguntza pribatua, pertsonak aurkitzea, janaria etxera eramatea, anbulantzia pribatuan edo garraio egokituan lekualdatzea, zerbitzu juridikoak eta notariotza-zerbitzuak.

IZAPIDEA ETA LAGUNTZA, ETXEZ ETXEKO LAGUNTZA-ZERBITZUEN KONTRATAZIOAN

Premiaz eta puntualki, edo aldi baterako (orduka), enpresa laguntzaileen bitartez.

LAGUNTZABIDE

Etxean krisi-egoeran dauden familiei laguntzeko eta familia zaintzaileekin eta mendekotasuna dutenekin bitartekaritza soziolaboralean aritzeko programa da, eta gizarteratzen, laneratzen, prestatzen eta enplegua bilatzen laguntzen du. Laguntza, informazioa eta aholkularitza jarraitua ematen ditu, etxean laguntzeko profesionalak kontratatzeko eta enplegatzeko izapideetan.

PROFESIONALAK BIRZIKLATZEKO PRESTAKUNTZA

Sektore soziosanitarioko etxeko profesionalak etengabe birziklatzeko prestakuntza, sortzen diren premien eta etxeetan lan egiten duten profesionalen prestakuntza-premien araberakoa. 

ZAINKETEN ARLOKO HASIERAKO PRESTAKUNTZA

Etxez etxeko zainketa-sektorean profesionalki lan egiten hasi nahi dutenentzako hasierako eta oinarrizko prestakuntza.

Esta web utiliza cookies propias para su correcto funcionamiento. Al hacer clic en el botón Aceptar, acepta el uso de estas tecnologías y el procesamiento de tus datos para estos propósitos.
Privacidad